पंधरावीस नातेवाईकांच्या गर्दीत
आपल्या माणसाकडे हळूच पाहणारी माणसं...
आसपासचं जग विसरून
एकमेकांत गुरफटलेली माणसं...
तरूणांच्या उत्साहासोबत
थकली भागली पावलं खेचणारी माणसं...
चुकूनमाकून मिळालेला घराबाहेरचा उजेड
नजरेत भरून घेणारी बुरख्याआडची माणसं....
वारंवार लिपस्टीक/ भांगेचा सिंदुर
निरखणारी घुंगटाआडची माणसं...
झाडां-फुलांची नावं लिहीणारी
शोधक नजरेची माणसं...
पिंजऱ्यातले प्राणी बघताना
आकाशातले पक्षी उत्सुकतेने पाहणारी माणसं...
जिथे ऐसपैस जागा दिसेल तिथे
खाऊच्या पुड्या उघडणारी माणसं...
पोराबाळांचा उदंड उत्साह बघून
उद्याच्या काळज्या विसरलेली माणसं...
प्रत्येक वळणावर सेल्फी घ्यायला
उभी राहिलेली माणसं...
लेकीसाठी एक फॅन्टा विकत घेताना
चारचारदा खिसा चाचपणारी माणसं...
...
हि सारीजणं
भविष्यात येऊ घातलेल्या
धर्म-शीतयुद्धात करपवलेली स्वप्नं घेऊन
कुठे जातील?
काय करतील?
...
...
...
न जाणो
कोणी काय सांगावं
...
हि माणसं एक होतील आणि
पाय रोवून उभी राहतील
माणुसकी आणि अहिंसेच्या कातळावर !
No comments:
Post a Comment